CAEx Mebel & Decor ko‘rgazmasi O‘zbekiston mebel bozori rivojiga qanday hissa qo‘shadi

CAEx Mebel & Decor ko‘rgazmasi O‘zbekiston mebel bozori rivojiga qanday hissa qo‘shadi

Muhokamaning asosiy mavzusi — CAEx Mebel & Decor ko‘rgazmasini O‘zbekistonda mebel sanoatini rivojlantirishga xizmat qiladigan samarali platforma sifatida qanday tashkil etish masalasi bo‘ldi. 

Uchrashuvda CAEx operatsion direktori Mehmet Dükkancı, CAEx Mebel & Decor loyihasi menejeri Shohruh Uralboev, savdo bo‘limi rahbari Davlat Artikov hamda sohaning yetakchi kompaniyalari vakillari — Surat Yusupov (Shosh Mebel), Aziz Egamberdiev (Nanxing), Rustamjon Abdullaev (Honor), Rahmatilla Toirjonov (Woodex) va Miraziz Mirvaliev (Ergo) ishtirok etdilar.

Soha bilan ochiq muloqot — kuchli ko‘rgazma asosi
Uchrashuv ochiq muloqot formatida o‘tdi. Ishtirokchilar zamonaviy sohaviy ko‘rgazma quyidagi asosiy vazifalarni bajarishi lozimligini ta’kidladilar:

● shartnomalar tuzish va muzokaralar olib borish uchun samarali B2B platforma yaratish;
● mahalliy ishlab chiqaruvchilar uchun savdo bozorlarini kengaytirish;
● xalqaro brendlar va ilg‘or texnologiyalarni jalb etish;
● milliy mebel mahsulotlarining eksport salohiyatini oshirish;
● soha ichida barqaror hamkorlik aloqalarini shakllantirish.

“Biz Mebel & Decor ko‘rgazmasi O‘zbekiston va Markaziy Osiyo bozorlarida mahalliy mebel ishlab chiqaruvchilari hamda xalqaro ishtirokchilar uchun samarali uchrashuv maydoniga aylanishini istaymiz. Shu bois, biz soha vakillari bilan hamkorlikka ochiqmiz va ko‘rgazma konsepsiyasini shakllantirishda ularning takliflarini inobatga olishga tayyormiz”, — dedi Mehmet Dükkancı.

Soha kelajagini birgalikda shakllantirish

Uchrashuv davomida tashkilotchilar va biznes vakillari o‘rtasidagi hamkorlikning ahamiyati alohida ta’kidlandi. Ishlab chiqaruvchilar va yetkazib beruvchilarning faol ishtirokisiz ko‘rgazma bozor ehtiyojlariga to‘liq javob bera olmaydi.

Tashkilotchilar CAEx Mebel & Decor ko‘rgazmasini O‘zbekiston mebel sanoatining yetakchi professional tadbiriga hamda butun Markaziy Osiyo mintaqasi uchun muhim savdo maydoniga aylantirish maqsadida soha bilan maslahatlashuvlarni davom ettirishni rejalashtirmoqda.

Shu tariqa, ko‘rgazma bir martalik tadbir sifatida emas, balki savdoni rivojlantirish, milliy ishlab chiqarishni mustahkamlash va o‘zbek mebel mahsulotlarini xalqaro bozorlarga integratsiya qilishga xizmat qiluvchi uzoq muddatli platforma sifatida ko‘rilmoqda.